Dagaal foolka foool oo caawa ka soconaya Xudur

Dagaalo xoogan ayaa waxay caawa ka qarxeyn Magaalada Xudur ee Gobolka Bakool, iyadoo dagaalada caawa ay yihiin kuwo ay faraha uga gubanayaan dhinacyada caawa ku dagaalamaaya Magaalada Xudur.

Dagaaladaan ayaa waxay yihiin kuwo qorsheysan oo ay soo qaadeen Ciidamadda Xarakada Al Shabaab, waxaana iska caabin xoog leh ugala horyimid Ciidamadda Dowladda iyo Ciidamadda Dowladda Itoobiya.

Dagaalada oo markii hore ka qarxay duleedka Magaalada Xudur ayaa waxay dagaalada ku soo fideen gudaha Magaalada Xudur, markii Ciidamadda Xarakada Al Shabaab ay soo jiireyn daafacyadii Ciidamadda Huwanta ay ku lahaayeen daafaha Magaalada Xudur.

Wararka ayaa waxay sheegayaan in shacabka ku dhaqan Magaalada Xudur ay caawa soo wajahday xaalad adag, kadib markii Magaalada ay caawa noqotay mid ruxmaneysa, oo ay ruxayaan hubka cul culus oo ay labada dhinac isku adeegsanayaan.

Wararka ayaa waxay intaasi ku darayaan in Magaalada Xudur ay horey ugu sugnaayeen gurmadyo xoog leh oo todobaadkii hore ay soo gaareyn Magaalada Xudur, kuwaa oo caawa ka qeyb qaadanaaya dagaaladaan.

17-kii bishaan barakeysan ee Ramadaan ayay ahayd markii Xarakada Al Shabaab ay ku soo qaadeen dagaalo culus, oo ay ugu magac-dareyn maalintii uu dhacay dagaalkii weynaa ee Beder, ee lagu laayay Gaaladii Qureysheed.

Short URL: http://www.somalpost.com/?p=2966

Posted by admin on Aug 15 2012. Filed under SOMALI NEWS. You can follow any responses to this entry through the RSS 2.0. You can leave a response or trackback to this entry